Deputeti i Partisë Demokratike Belind Këlliçi ka denoncuar ditën e sotme abuzimin me fondet për shkollën e mesme profesionale në Bushat.

Ai deklaroi se numri i nxënësve që e ndjekin këtë shkollë ka rënë ndjeshëm megjithatë numri i punonjësve është rritur fiktivisht me familjarë të kryetarit dhe zyrtarëve të tjerë të bashkisë së Vaut të Dejës.

“Sot Shqipëria ndodhet në një situatë kur të rinjtë largohen nga vendi. Shkollat më të mira po mbyllen. Edhe në zona të thella të Shqipërisë kur institucionet janë themeluar me fonde të KiE, ato shkojnë drejt mbylljes për shkak se vidhen paratë që dedikohen për nxënësit.

Në këtë institucion numri i nxënësve që e ndjekin ka rënë me 80% ndërsa numri i punonjësve është rritur me 50%. Ato para që shkojnë për bursa dhe trajtimin e nxënësve vidhen. Bursa shkon në xhepin e kryetarit dhe nënkryetarit të bashkisë së Vaut të Dejës. Kanë arritur në pikën sa vjedhin para për lekë kafeje. Të afërmit e kryetarit të bashkisë janë punësuar faktikisht. Problemi që ndodh sot është që fondet e MF shkojnë në fondet e bashkisë”, tha ai.

Këlliçi deklaroi se vazhdojnë të jepen bursa për nxënës që nuk shkojnë fare në shkollë ndërsa paratë vidhen nga zyrtarët e bashkisë. Ndërsa shtoi se listprezencat e nxënësve bëhen në mënyrë fiktive

“Kemi një drejtësi që vepron me dy standarde. Bursa e nxënësve që nuk vijnë fare në këtë shkollë vidhet nga zyrtarët e kryetarit të bashkisë. Familjarë të tre nxënësve të ndryshëm tregojnë se kanë mbi një vit që kërkojnë të marrin bursat për fëmijët e tyre por nuk marrin asnjë përgjigje nga bashkia. Bashkia e Vaut të Dejës është një nga zonat më të prekura sa i përket fenomenit të emigracionit. Unë kam ardhur nga Tirana këtu është se ata nuk marrin përgjigje dhe nuk marrin drejtësi.

Ka ardhur momenti që zëri të ngrihet në çdo cep të Shqipërisë. Shqipëria sot është në luftë për të mbajtur më të mirët në vendin e tyre. Ne do të depozitojmë sot edhe listprezencat e nxënësve që bëhet në mënyrë fiktive. Ky është një problem shumë i madh. Kjo aferë tregon makutërinë e drejtuesve të bashkisë së Vaut të Dejës. Flasim për një qark që nuk ka investime nga qeveria dhe kryeministri. Është qarku më i diskriminuar.

Kam një mesazh për çdo të ri, Na dërgoni fakte dhe denoncime dhe ne do të jemi zëri juaj. Ditët e kësaj qeverie janë shumë herë më të shkurtra. Ne do të luftojmë përditë me greva, protesta dhe denoncime për të larguar një qeveri që vetëm për qytetarët nuk punon”, u shpreh ai.