Ditën e sotme, Aleanca për Teatrin ka mbajtur një protestë para SPAK-ut, për të kërkuar që prokuroria e Posaçme të vihet në veprim për hetimet sa i takon shembjes së Teatrit Kombëtar tashmë që kanë kaluar tre vite.

Një prej anëtareve të Aleancës, tha se shqiptarët tashmë nuk solidarizoheshin dhe zgjidhnin që të largoheshin në vende të tjera në vend që të luftonin për të ndërtuar demokracinë në vendin e tyre.

“Tipari i mungesës së solidaritetit, duket se ka përfshirë shoqërinë shqiptare. Secili shqiptar tashmë e ka kufizuar jetën e vetë brenda 4 mureve. Kjo është një utopi, të mendosh se streha jote të ketë qetësi, ndërsa digjet një fshat i tërë. Si duket shqiptarët e kanë më të lehtë të shkojnë dhe konsumojnë vlerat e demokracisë, në vendet e tjera, ndërsa nuk marrin mundimin ta bëjnë këtë në vendin e tyre. Sepse i duan gjërat gati, thonë jemi popull i zgjuar.

Ja pse u shemb teatri kombëtar, ja pse vazhdojnë të shemben pronat tuaja dhe askush nga fqinjët tuaj nuk solidarizohet me ju.
Ne kemi vendosur të zgjedhim rrugën më tëvështirë, të vazhdojmë të përmirësojmë gjërat këtu në Shqipëri. Nëse ju dëshironi të bashkoheni me ne, dilni protestoni me të madhe, jo nga facebook-u sepse ndryshe do të çmendeni. Protestoni që pushtetet të kryejnë punën e tyre, drejtësia të bëjë punën siç duhet”– u shpreh ajo ndër të tjera.