E pyetur për pagesat që vijojnë të bëhen për inceneratorët pavarësisht se pronarët e këtyretë fundit janë shpallur në kërkim, zëvendës kryeministrja, Belinda Balluku tha se kjo ishte një çështje e drejtësisë dhe se qeveria nuk ndërhynte në këtë pjesë.
Më tej ajo tha se nxiste drejtësinë që çështja të zbardhej sa më shpejt të ishte e mundur.
“Sa i përket projekteve, drejtësia bën detyrën dhe në Shqipëri ka nga 2013 që drejtësia dhe qeveria i kanë rrugët e ndara. Ne nuk kemi ndërhyrë kurrë në rrugët e drejtësisë, madje e nxisim të marrë në shqyrtim ato dosje në dritëhije. Është çështje tjetër ajo e drejtësisë me inceneratorët. Ndërsa progreset e qeverisë Shqiptare për pastrimin në 9 vitet e fundit, janë të pakrahasueshme. Këto janë fakte të pamohueshme.
Nuk i kemi shpikur ne inceneratorët, nëse do e kishim bërë ne, do kishim emër. Nuk e di cilën preferoni ju fushën apokalipto në Durrës apo plehrat e inceneruara. Ne nxisim drejtësinë që çështja të marrë shpjegimin e duhur sa më shpejt”-tha Balluku.
