Kryetari i PD-së, Sali Berisha akuzoi sot kryeministrin Rama se po bën gjithçka për të mos dëmshpërblyer banorët e përmbytur në zonat veriore të vendit.
“Njeriu që i përmbyti ka dy ditë që gënjen në mënyrë të turpshme shqiptarët. Në vend që të shkarkojë të gjithë zinxhirin e përgjegjësve, nuk di çfarë flet. Nuk shkoi dot në Shkodër, shkoi deri në Obot dhe u kthye siç shkoi. Bën gjithçka të mos i dëmshpërblejë. Nuk shkonte në Shkodër, shkonte në Sukth për të justifikuar Sakon dhe ballon e saj. Në kulmin e përmbytjeve Sako kishte organizuar ballo për kryeministrin te Kodra e Kuajve. E përgëzoj qytetarin që i tha “ne s’kemi përmbytje, shko në Shkodër”. Përfundoi në spital ai, ky i bërtiste qytetarit “burg, burg”. Ky amendament është shumë i rëndësishëm. Të krijohet fondi i rezervë sepse ligji shqiptar thotë “ai që përmbyt, ai paguan””, tha Berisha.
Sipas tij “trefishim i dëmshpërblimit për të përndjekurit politikë. Ky proces duhet të kishte përfunduar sipas të gjitha parashikimeve ligjore. Ky me një të rënë të lapsit përjashtoi 6 mijë shqiptarë të pushkatuar, familjet e tyre për të përfituar dëmshpërblimin simbolik. Për të justifikuar veprën e etërve të tij i përjashtoi. Për pedagogët e universitetit kërkohet rritja e pagave 30%”.
