Samiti i datës 6 Dhjetor që do të mbledhë në Tiranë liderët e vendeve të Bashkimit Europian si dhe Ballkanit Perëndimor, do i kushtojë shqiptarëve një faturë financiare prej 50 milionë lekësh të reja nga buxheti i shtetit.

Në mbledhjen e sotme të këshillit të ministrave është marrë vendimi për një shtesë fondi në buxhetin e vitit 2022 prej 50 milionë lekësh, për përballimin e shpenzimeve të organizimit të Samitit Bashkimi Europian-Ballkani Perëndimor që do të mbahet në Tiranë.

Në vendim saktësohet se efekti financiar për këtë shpenzim do të përballohet nga fondi rezervë i buxhetit të shtetit i miratuar për vitin 2022.

“Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë, të ndryshuar, dhe të ligjit nr.115/2021, “Për buxhetin e vitit 2022”, të ndryshuar, me propozimin e ministrit të Financave dhe Ekonomisë, Këshilli i Ministrave

V E N D O S I: 1. Drejtorisë së Shërbimeve Qeveritare, në buxhetin e miratuar për vitin 2022, i shtohet fondi prej 50 000 000 (pesëdhjetë milionë) lekësh, për përballimin e shpenzimeve të organizimit të “Samitit të BE-BP”, që do të organizohet në Tiranë, në datën 6 dhjetor 2022.

Efekti financiar, prej 50 000 000 (pesëdhjetë milionë) lekësh, të përballohet nga fondi rezervë i buxhetit të shtetit, i miratuar për vitin 2022.

Ngarkohen Ministria e Financave dhe Ekonomisë dhe Drejtoria e Shërbimeve Qeveritare për zbatimin e këtij vendimi. Ky vendim hyn në fuqi menjëherë dhe botohet në “Fletoren zyrtare”, thuhet në vendimin e qeverisë.

Liderët e vendeve të Bashkimit Europian dhe Ballkanit Perëndimor mblidhen për herë të parë në Tiranë për të mbajtur samitin e parashikuar në datë 6 Dhjetor. Në po të njëjtën datë ish kryeministri Sali Berisha ka paralajmëruar protestën e radhës të opozitës.