Policia e Shkodrës ka finalizuar operacionin e koduar “Mushan”, duke vënë në pranga një nga autorët e ngjarjes së ndodhur më datë 28.11.2020, ku mbeti i vrarë shtetasi R. H.
Në prangat e Policisë së Shkodrës ka rënë 34-vjeçari Hydajet Mehmedaj ,banues në fshatin Mushan, pasi dyshohet si një nga autorët e vrasjes së shtetasit Ridvan Hyseni.
Dyshohet se Hydajet Mehmedaj ka bashkëpunuar në krim me Duel Mehmedaj (i shpallur në kërkim), si dhe me 25-vjeçarin Milkjor Gjoka që u arrestua ditën e ngjarjes.
Arrestimi i Hydajet Mehmedajt u bë pas informacioneve të marra nga policia, që e lokalizoi teksa po qëndronte në një bar-kafe në fshatin Mushan.
Njoftimi i policisë
Finalizohet operacioni policor i koduar “Mushan”.
Vihet në pranga një nga autorët e ngjarjes së ndodhur më datë 28.11.2020, ku mbeti i vrarë shtetasi R. H.
Nga strukturat e posaçme të DVP Shkodër, në bashkëpunim me Komisariatin e Policisë Shkodër, pas informacioneve të marra në rrugë operative dhe punës së mirorganizuar u bë kapja dhe ndalimi i shtetasit të shpallur në kërkim:
Hydajet Mehmedaj, 34 vjeç, banues në fshatin Mushan, Shkodër.
Arrestimi i këtij shtetasi u bë pas informacioneve të marra dhe lokalizimit të tij në një bar-kafe në fshatin Mushan, Shkodër.
Ky shtetas, në bashkëpunim me shtetasit D. M. (i shpallur në kërkim) dhe M. Gj. (i arrestuar ditën e ngjarjes), më datë 28.11.2020, ka vrarë me armë zjarri shtetasin R. H., 46 vjeç, banues në fshatin Darragjat, Shkodër.
Për shtetasin Hydajet Mehmedaj, Prokuroria e Rrethit Gjyqësor Shkodër, më datë 01.12.2020, ka nxjerrë urdhër ndalimi për veprat penale “Vrasja me paramendim” kryer në bashkëpunim dhe “Mbajtja pa leje e armëve dhe municionit”.
Materialet iu referuan Prokurorisë së Rrethit Gjyqësor Shkodër, për veprime të mëtejshme.
