Media italiane “Canale 5”, i ka dedikuar një kronikë speciale televizive fluksit të turistëve italianë që kanë zgjedhur të kalojnë pushimet gjatë kësaj vere në Shqipëri.

Teksa shprehen se “aeroporti i Tiranës flet italisht”, Canale 5 thekson se çmimet në Shqipëri janë më të ulëta në krahasim me vendin fqinjë.

Qytetarë të ndryshëm italianë janë shprehur se kanë arritur të sigurojnë biletën e avionit, shtëpinë dhe makinën për vetëm 150 euro, ndërsa të tjerë thonë se mund të marrin një çadër me 2 shezlonge për 5 euro përgjatë bregdetit të Durrësit.

“Çmimet në plazh në krahasim me Italinë janë shumë më të ulëta, madje edhe ushqimet e restoranteve, ku prodhimet e detit joshin turistët, por pa iu boshatisur portofolin”, shprehet gazetari italian për Canale 5.

Megjithatë jo vetëm Durrësit ka arritur të joshë shtetasit italianë, të cilët i janë drejtuar edhe bregdetit të Kavajës ku kanë mundur të gjejnë plazhin me rërë të bardhë.

“Në dy vitet e fundit numri i turistëve italianë në Shqipëri është rritur ndjeshëm. Në vitin 2022 ishin mbi 70 përqind më shumë se sa në vitin 2021″, raporton gazetari.