Pjesë e votimeve elektorale këtë vit do të jenë pajisjet më të avancuara teknologjike që do të kryejnë identifikimin elektronik, që shërben për të garantuar zgjedhje transparente e duke evituar çdo tentativë për shkelje ligjore.
Kjo pajisje regjistron të dhënat e qytetarëve në mënyrë të inkriptuar dhe përmes databazës së saj shfaq të dhënat e përgjitshme, fotot dhe qendrat përkatëse ku qytetarët do të ushtrojnë të drejtën e votës. Përmes regjistrimit së të dhënave, pajisja zbulon dhe verifikon çdo tentativë për votim të dyfishtë.
Në magazinat e Komisionit Shtetëror të Zgjedhjeve kanë mbërritur të gjitha pajisjet, të cilat do të përdoren më 25 prill për identifikimin elektronik të votuesve në të 5199 Qendrat e Votimit.
Por jo në të gjitha Qendrat e Votimit janë të garantuar operatorë, të cilët do kenë si detyrë implementimin dhe monitorimin e procesit të identifikimit elektronik të zgjedhësve. KQZ vijon trajnimin e rreth 4 mijë operatorëve, ndërkohë që thirrja për aplikime mbetet e hapur. Mangësi ka kryesisht për Qendrat e Votimit në zona rurale.
Nënkomisionerja e KQZ, Lealba Pelinku, garanton se nëse për një arsye, një pajisje mund të bllokohet e nuk do funksionojë, atëherë do të zëvendësohet për të vijuar më pas me identifikim të votuesve dhe procesin e votimit.
Komisioni Shtetëror i Zgjedhjeve ka përmbyllur testimin përfundimtar të pajisjeve që do të përdoren për identifikimin elektronik. Gjatë ditës së votimit, inspektorë të KQZ do të jenë në terren për të vëzhguar zbatimin e këtij procesi.
