Menaxheri i një pike karburanti është arrestuar një ditë pas shpërthimit të ndodhur në biznesin e tij në kryeqytet. Ai akuzohet për shkelje të rregullave të sigurisë mbi lëndët plasëse dhe djegëse në vendin e punës.
Shpërthimi ka ndodhur në valvulën e sigurisë të një depoje të gazit, e cila ishte ngjitur me pikën e karburantit. Si pasojë e shpërthimit, janë plagosur menaxheri i pikës me inicialet M. Ç. dhe shoferi i autobusit me inicialet M. K. Ngjarja ka ndodhur dje rreth orës 13:30 në Rrugën Bardhyl. Autoritetet po hetojnë ngjarjen për të zbuluar shkaqet dhe përgjegjësitë e mundshme.
Njoftimi i policisë:
Specialistët për Hetimin e Krimeve të Komisariatit të Policisë Nr. 4 arrestuan shtetasin M. S., 42 vjeç, banues në Tiranë, për veprën penale “Shkelja e rregullave mbi lëndët plasëse dhe djegëse”, menaxher në një pikë karburanti në Rrugën Bardhyl.
Ditën e djeshme, në karburantin ku ky shtetas punon, gjatë momentit të shkarkimit të lëndëve djegëse nga depozita e autobotit për në depozitat e tjera, ka ndodhur një shpërthim zjarri, dhe si pasojë është dëmtuar shtetasi M. S., dhe shtetasi M. K., shoferi i autobotit.
42-vjeçari ndodhet aktualisht në spital nën kujdesin e mjekëve, ndërsa shtetasi M. K., pas marrjes së ndihmës mjekësore është larguar në banesë. Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
