Sekretari i Shtetit Antony Blinken zhvilloi një vizitë të papritur në Ramallah, ku u takua me udhëheqësin e autoritetit palestinez, Mahmud Abbas.
Takimi vjen në kontekstin e tensioneve të larta në Lindjen e Mesme. Gjatë bisedimeve, Sekretari Blinken bëri të qartë se palestinezët nuk duhet të zhvendosen me forcë. Presidenti i Autoritetit palestinez, Mahmud Abbas, kërkoi një armëpushim të menjëhershëm izraelit, ndërsa Kryeministri izraelit Benjamin Netannyahu tha se kërkesa për armëpushim nuk do të merret parasysh derisa të lirohen të gjithë personat e marrë peng nga Hamasi.
Sekretari Blinken riafirmoi angazhimin amerikan për ndihmë humanitare dhe rifillimin e shërbimeve thelbësore në Gazë gjatë luftës së Izraelit kundër Hamasit.
Sekretari Blinken dhe zoti Abbas diskutuan përpjekjet për të rikthyer qetësinë dhe stabilitetin në Bregun Perëndimor, përfshirë nevojën për të ndaluar dhunën ekstremiste kundër palestinezëve dhe për t’i mbajtur përgjegjës ata që sulmojnë palestinezët”, tha zoti Miller.
“Sekretari Blinken përsëriti se Shtetet e Bashkuara mbeten të përkushtuara për avancimin e masave të barabarta të dinjitetit dhe sigurisë si për palestinezët ashtu edhe për izraelitët. Sekretari Blinken shprehu gjithashtu angazhimin e Shteteve të Bashkuara për të punuar drejt realizimit të aspiratave legjitime të palestinezëve për krijimin e një shteti palestinez”, shtoi zëdhënësi i Departamentit amerikan të Shtetit, Matthew Miller.
Agjencia palestineze e lajmeve WAFA njoftoi se gjatë takimit, udhëheqësi u autoritetit palestinez Mahmoud Abbas kërkoi një armëpushim të menjëhershëm izraelit pas njoftimit të Ministrisë së Shëndetësisë në Gazë se dhjetëra njerëz kishin humbur jetën gjatë sulmit në një kamp refugjatësh të shtunën në mbrëmje. Sekretari Blinken ka bërë thirrje për pauza humanitare në konflikt, diçka që Izraeli e ka refuzuar deri më tani.
