Kryeministri grek Kyriakos Mitsotakis akuzoi homologun britanik Rishi Sunak për anulimin e një takimi në Londër për shkak të mosmarrëveshjeve mbi skulpturat e Partenonit. Greqia kërkon kthimin e skulpturave nga Muzeu Britanik, ndërsa kryeministri britanik mbrohet duke thënë se ato janë blerë ligjërisht. Bisedimet për një marrëveshje të mundshme nuk po përparojnë sa duhet, shpreh pakënaqësi Mitsotakis.

Kryeministri grek Kyriakos Mitsotakis akuzoi homologun e tij britanik Rishi Sunak se kishte anuluar një takim të planifikuar mes tyre për të martën në Londër, për shkak të një mosmarrëveshjeje diplomatike mbi skulpturat e Partenonit.

Greqia i ka kërkuar shpesh Muzeut Britanik që të kthejë skulpturat 2500-vjeçare që diplomati britanik Lord Elgin mori nga tempulli i Partenonit në fillim të shekullit të 19-të kur ai ishte ambasador në Perandorinë Osmane.

“Shpreh keqardhjen që kryeministri britanik anuloi takimin e planifikuar mes nesh, vetëm disa orë para se ai të mbahej”, tha zoti Mitsotakis në një deklaratë.

“Qendrimet e Greqisë për çështjen e skulpturave të Partenonit janë të mirënjohura. Shpresoja t’i diskutoja ato me homologun tim britanik. Cilidp që beson në drejtësinë e qendrimeve të veta nuk ka frikë kurrë të përballet me argumente,” tha ai.

Qeveria greke ka qenë në diskutime me kryetarin e Muzeut Britanik, George Osborne, për një marrëveshje të mundshme për skulpturat, të cilat kanë qenë një burim mosmarrëveshjesh midis dy vendeve për shekuj me radhë.

Kryeministri Mitsotakis shprehu pakënaqësinë në një intervistë me BBC-në të dielën se bisedimet mbi një kthim të mundshëm të skulpturave në Athinë nuk po përparonin aq shpejt sa ç’duhej.

Një zyrtar i qeverisë britanike, i cili foli në kushtet e anonimitetit, tha se mosmarrëveshja mbi statujat nënkuptonte se nuk ishte e përshtatshme që të mbahej takimi.

Më herët, një zëdhënës i zotit Sunak tha se nuk kishte në plan t’i kthente skulpturat. E pyetur në lidhje me deklaratën e zotit Mitsotakis, zyra e kryeministrit Sunak tha se marrëdhënia e Britanisë me Greqinë ishte “shumë e rëndësishme” dhe të dy vendet duhej të punonin së bashku për sfidat globale si zgjidhja e migracionit të paligjshëm.