Sipas një studimi të kryer nga ekspertët Ilir Gëdeshi dhe Russell King, Shqipëria po përjeton një fenomen të quajtur “emigracion kronik,” veçanërisht në mesin e studentëve. Studimi fokusohet në mbi 600 studentë shqiptarë që studiojnë jashtë vendit dhe zbulon një prirje të tyre të lartë drejt emigracionit.

Të dhënat e vitit 2017 tregojnë se 17,488 studentë shqiptarë studiojnë jashtë vendit, me shumicën e tyre (59.4%) në Itali, ndjekur nga Greqia (6.9%) dhe Turqia (5.7%). Shumica e tyre janë pasardhës të profesionistëve dhe biznesmenëve shqiptarë.

Studiuesit konkludojnë se ekziston një prirje e theksuar për të emigruar për arsye studimesh, ndërsa cilësia e universiteteve në Shqipëri nuk po përmirësohet. Pjesa më e madhe e studentëve jashtë vendit janë financuar nga familjet më të pasura dhe politikisht të fuqishme. Ata preferojnë studimet në universitete të rangut të lartë në vendet e BE-së, si dhe në Mbretërinë e Bashkuar.

Për të ndaluar këtë trend, studiuesit sugjerojnë përmirësimin e standardeve të universiteteve shqiptare dhe lidhjen e tyre në rrjetet akademike ndërkombëtare. Ata propozojnë gjithashtu krijimin e perspektivave të punësimit dhe të ardhurave më të larta në vend, për të inkurajuar të rinjtë të qëndrojnë dhe të kontribuojnë në zhvillimin e Shqipërisë.