Një ngjarje tragjike ka ndodhur në lagjen “Kryengritja e Fierit” në Fier, ku një grua e moshuar rreth të 70-ave është gjetur pa shenja jete në shtëpinë e saj. Burimet bëjnë të ditur se shërbimi zjarrfikës është intervenuar menjëherë pas njoftimit dhe ka hapur me forcë derën e shtëpisë, ndërkohë që dyshohet se e moshuara nuk ka treguar shenja jete.

Ekipet e ambulancës kanë transportuar trupin e gruas drejt spitalit rajonal të Fierit për të bërë ekspertizën e nevojshme. Identiteti i saj është konfirmuar si Gjinovefa Toro, 70-vjeçe.

Sipas informacioneve të para, duket se e moshuara kishte lënë qumështin në zjarr, dhe era e shkrumbuar ka shkaktuar shqetësim te komshinjtë. Raportohet se një orë më parë, 70-vjeçarja kishte dalë për të blerë bukë, por ngjarja e papritur ka lënë komunitetin në shok. Autoritetet lokale po hetojnë për të zbuluar më shumë detaje rreth kësaj ngjarje tragjike.