Agjencia e Mbikëqyrjes Policore në Rajonin Korçë-Elbasan ka ekzekutuar urdhërin e Prokurorisë pranë Gjykatës së Shkallës së Parë të Juridiksionit të Përgjithshëm në Korçë për ndalimin e punonjësit të Policisë, Kryekomisar S.P., 53 vjeç, i cili ka detyrën e Shefit të Sektorit të Kufirit pranë Drejtorisë Vendore të Kufirit dhe Migracionit (DVKM) në Korçë.

Ndalimi ka ndodhur në kuadër të hetimeve të procedimit penal të vitit 2023, të regjistruar për veprën penale “Trafikim i narkotikëve”. Nga hetimet rezulton se Kryekomisari S.P. ka shfrytëzuar pozicionin e tij në DVKM Korçë për të favorizuar një shtetas në kryerjen e trafikimit të drogës. Ai dyshohet se ka lejuar shtetasin L.L. të kalojë kufirin në PKK Kapshticë pa u nënshtruar kontrollit kufitar dhe ka urdhëruar vartësit e tij për mos kryerjen e kontrolleve në mjetin e tij.

Gjatë këtij procedimi, bashkëpunimi me Policinë greke ka mundësuar kapjen e 26 kg lëndëve narkotike në territorin e Greqisë. Hetimet vazhdojnë për identifikimin e të tjerëve të përfshirë në këtë aktivitet të paligjshëm dhe sjelljen e tyre para përgjegjësisë penale. Ky rast shënon një përpjekje të përbashkët shqiptaro-greke për luftën kundër trafikut të drogës.