Agjencia e Mbikëqyrjes Policore (AMP) në Rajonin Korçë-Elbasan ka publikuar detaje të arrestimit të Kryekomisarit Stilian Pasho, i cili kishte detyrën e Shefit të Sektorit të Kufirit në Drejtorinë Vendore të Kufirit dhe Migracionit Korçë.

Duke iu referuar urdhrit të Prokurorisë pranë Gjykatës së Shkallës së Parë të Juridiksionit të Përgjithshëm në Korçë, Kryekomisari S.P., 53 vjeç, është ndaluar në kuadër të procedimit penal të vitit 2023 për veprën penale “Trafikim i narkotikëve”. Dyshohet se ai ka shfrytëzuar pozicionin e tij në Drejtorinë Vendore të Kufirit dhe Migracionit (DVKM) Korçë për të favorizuar një shtetas në kryerjen e trafikimit të drogës.

Sipas hetimeve, Kryekomisari S.P. ka favorizuar shtetasin L.L. që të kalojë kufirin në PKK Kapshticë pa u nënshtruar kontrollit kufitar në mjetin e tij. Ai dyshohet se ka dhënë urdhër vartësve të tij për mos kryerjen e kontrolleve në mjetin e shtetasit të favorizuar.

Bashkëpunimi me Policinë greke ka rezultuar në kapjen e 26 kg lëndëve narkotike në Greqi. Hetimet e vazhdojnë për identifikimin e personave të tjerë të mundshëm të përfshirë në aktivitet të paligjshëm dhe ndjekjen penale të tyre. Ministri i Brendshëm, Sandër Lleshaj, ka përgëzuar Agjencinë e Mbikëqyrjes Policore për dokumentimin e plotë të rastit.