Autori i dyshuar i vrasjes së Liridona Murseli, Granit Plava ka deklaruar para hetuesve se u pagua për të kryer krimin nga bashkëshorti i saj, Naim Murseli.

Ai ka deklaruar se këshilltari i Behgjet Pacollit i ka premtuar 30 mijë euro për të kryer vrasjen e 33-vjeçares, ngjarje e cila ndodhi mbrëmjen e së mërkurës (29 nëntor) në rrugën “Dalip Alshiqi” në Prishtinë.

Ai ia kishte dhënë një pjesë të shumës Granit Plavas, ndërsa kishin rënë dakord që pjesa tjetër të paguhej më vonë.

Naim Murseli dhe Granit Plava janë arrestuar në fshatin Rakovinë të Gjakovës.

Granit Plava dyshohet të jetë nga fshati Cerrmjan, nga ku ishte edhe viktima, Liridona Murseli.

“Pas përfundimit të ekzaminimit të vendit të ngjarjes, janë ndërmarrë veprimeve intensive hetimore të cilat kanë rezultuar në arrestimin e dy personave të dyshuar lidhur me rastin e sipër shënuar.

Njësiti i hetimeve të përgjithshme të Prishtinës në koordinim me Prokurorinë është duke e vazhduar operacionin e bastisjes në dy lokacione në Gjakovë” ka bërë të ditur policia.