Policia e Tiranës ka shpallur në kërkim kandidatin për deputet të LSI, Etion Joka, i cili shfaqej në një video të publikuar në media duke dhënë para për vota.

Policia e Tiranës ka ndaluar militantin e Lëvizjes Socialiste për Integrim, Edison Babo për veprën penale “Korrupsioni pasiv në zgjedhje”.

Gjithashtu policia ka shpallur në kërkim kandidatin e LSI për Tiranën, Etjon Joka, i cili gjithashtu doli me zë dhe figurë në përgjime.

Sipas policisë, janë ushtruar disa kontrolle por deri tani nuk është bërë e mundur kapja e kandidatit te LSI.

Policia thekson se kandidati i LSI dyshohet për një rast korrupsioni në fushatën zgjedhore, ndërsa bën me dije se ka kaluar dosjen në SPAK.

Njoftimi i policisë

Specialistët e Seksionit për Hetimin e Korrupsionit në Drejtorinë Vendore të Policisë Tiranë bënë ndalimin për veprën penale “Korrupsioni pasiv në zgjedhje”, të shtetasit E. B., 30 vjeç, si dhe shpallën në kërkim për veprën penale “Korrupsioni aktiv në zgjedhje”,” shtetasin E. J., 32 vjeç, kandidat për deputet i një subjekti politik për qarkun e Tiranës.

Në kuadër të procedimit penal, datë 23.04.2021 të SPAK dhe bazuar në pamjet filmike të transmetuara në media dhe  rrjete sociale, këta dy shtetas janë të dyshuar për një rast korrupsioni në fushatën zgjedhore.

Shërbimet e Policisë kanë ushtruar disa kontrolle por deri tani nuk është bërë e mundur kapja e shtetasit E. J.

Materialet proçeduriale iu kaluan Prokurorisë së Posaçme Kundër Korrupsionit dhe Krimit të Organizuar, në ngarkim të shtetasit E. B., për veprën penale “Korrupsioni pasiv në zgjedhje”,  dhe në ngarkim të shtetasit E. J., për veprën penale “Korrupsioni aktiv në zgjedhje”.