Dy janë risitë e këtyre zgjedhjeve. Së pari, votuesit do të identifikohen nga një pajisje elektronike, dhe jo nga komisionerët, për të shmangur votimet e shumëfishta. Së dyti, për herë të parë në këto zgjedhje, veç partisë, do të mund të votojmë edhe kandidatin tonë brenda së një njëjtës parti, duke i dhënë mundësi atyre që janë dukshëm më të votuar, të fitojnë, edhe nëse kryetari i partisë e ka renditur poshtë në listë.

Në qendrën e votimit mund të shkosh me një kartë identiteti ose me një pasaportë, edhe nëse ajo të ka skaduar. Qeveria, vendosur të shtyjë vlefshmërinë e tyre edhe nëse nuk e keni rinovuar. Më një prej këtyre mjeteve identifikimi, duhet të shkoni në qendrën e votimit. Komisioneri do ta marrë dokumentin dhe do ta skanojë në këtë pajisje elektronike, e cila është e aftë të dallojë nëse i përket asaj qendre votimi dhe të mos lejojë votimin e shumëfishtë. Pasi të marrë edhe shenjën e gishtit, komisioni do t’ju pajisë me fletën e votimit.

Në dhomën e fshehtë, ju mund të votoni, jo vetëm për partinë, por edhe për kandidatin e preferuar brenda së njëjtës partie. Tre janë format e rregullta të votimit.

Mënyra e parë: ju mund të zgjidhni një prej 12 partive apo koalicioneve, ose një kandidat të pavarur, duke shënuar me kryq në kutinë e madhe majtas. Po ashtu, tek i njëjti subjekt, ju mund të zgjidhni vetëm një kandidat të preferuar, duke shënuar një numër. Nëse nuk e mbani mend se cfarë numri ka kandidati juaj i preferuar, pas shpinës suaj, tek dhoma e fshehtë, do të jenë të afishuar në mur të gjitha partitë, të gjithë kandidatët e tyre, me të gjithë numrat përkatës.

Mënyra e dytë: ju mund të votoni vetëm partinë tuaj të preferuar, pa u shprehur se cilin nga kandidatët e saj mbështesni.

Mënyra e tretë: është të votoni vetëm kandidatin tuaj të preferuar, pa u shprehur për partinë.

Ju nuk mund të votoni dy parti njëkohësisht. As dy kandidatët të ndryshëm të së njëjtës parti, dhe as dy kandidatë të partive të ndryshme.

Është votë e pavlefshme, nëse ju votoni një parti të caktuar dhe një kandidat që i takon një partie tjetër.

Të gjitha shenjat tuaja të zgjedhjes duhet të jenë brenda së njëjtit rresht.

Votimi do të hapet në orën 7 të mëngjesit dhe si rregull duhet të mbyllet në 7 në mbrëmje. Pasi kutitë të mbyllen, ato do të transportohen në 92 qendra numërimi, ku do të fillojë raundi i dytë i zgjedhjeve.

Kësaj here, votat do të numërohen dy herë. Në raundin e parë, do të numërohen votat  e partive, dhe do të shpallet rezultati kombëtar se sa mandate ka fituar secili subjekt.

Më pas, kutitë do të rihapen nga e para, dhe do të numërohen votat e kandidatëve, për të shpallur deputetët fitues të secilës parti që ka marrë mandate në Kuvend. Edhe kësaj here, pavarësisht disa përpjekjeve, komisionerët dhe numëruesit do të jenë politikë.