Në kuadër të operacionit të quajtur “Lomas”, agjentët e Gardës Civile në Spanjë kanë ndërmarrë një goditje të rëndë kundër një grupi kriminal shqiptar të përfshirë në kultivimin e marijuanës në ambiente të mbyllura në Alhaurín el Grande. Hetimi filloi në vitin 2023 dhe çoi në zbulimin e një plantacioni të madh, i lidhur ilegalisht me rrjetin elektrik.

Agjentët konfirmuan ekzistencën e plantacionit në dy banesa të ndryshme, ku zbuluan 795 bimë të mëdha marijuane dhe rreth 4.7 kilogramë sytha të përgatitura për shitje, të paketuara me vakum. Instalimi i sofistikuar i plantacionit vlerësohet në më shumë se 20,000 euro.

Gjatë operacionit, u arrestuan dy persona me origjinë shqiptare dhe një person me origjinë çeke. Ata akuzohen për anëtarësim në organizatë kriminale, trafik droge dhe mashtrim me energjinë elektrike. Autoritetet gjyqësore kanë urdhëruar burgim për dy prej të arrestuarve, ndërsa hetimet vazhdojnë për të zbardhur plotësisht detajet e veprave kriminale të grupit.