Sot, liderët e Ballkanit Perëndimor janë mblidhur në Tiranë për të diskutuar dhe koordinuar zbatimin e Planit të Rritjes Ekonomike të BE-së për rajonin. Ky plan synon të ndihmojë në rritjen ekonomike, përshpejtimin e reformave dhe investimet në vendet e Ballkanit Perëndimor, duke përcaktuar katër shtylla kryesore.
Plani synon të forcojë integrimin ekonomik në tregun unik të BE-së, të përmirësojë bashkëpunimin rajonal, të përshpejtojë reforma të rëndësishme dhe të ofrojë asistencë financiare për të mbështetur reformat në rajon. Këto përpjekje janë në përputhje me synimet e Procesit të Berlinit dhe krijimin e një tregu të përbashkët rajonal në Ballkanin Perëndimor. Planin e ka miratuar Komisioni Evropian dhe përfshin një fond prej 6 miliardë euro për të ndihmuar në zbatimin e reformave dhe rritjen ekonomike.
Plan i ri për rritje ekonomike në vendet e Ballkanin Perëndimor, i miratuar nga Komisioni Evropian, më 8 nëntor të vitit 2023, është i bazuar në katër shtylla.
Shtylla e parë është “forcimi i integrimit ekonomik në tregun unik të BE-së”.
Kjo do të varet nga përshtatja e vendeve të rajonit me rregullat e tregut unik dhe paralelisht hapja e tregut të tyre në sektorët përkatës për vendet fqinje.
Shtylla e dytë e këtij plani është “forcimi i integrimit ekonomik brenda Ballkanit Perëndimor përmes tregut të përbashkët rajonal”.
Kjo, sipas përvojës së BE-së do të ndikojë në një rritje potenciale ekonomike prej 10 për qind.
Shtylla e tretë e këtij plani është “përshpejtimi i reformave fundamentale“. Kjo nënkupton dhe sundimin e ligjit që ndihmon edhe në tërheqjen e investimeve direkte të huaja dhe forcon stabilitetin rajonal.
Shtylla e katërt e planit të ri të Komisionit Evropian për rritje ekonomike në Ballkanin Perëndimor është “rritja e asistencës financiare për të ndihmuar reformat“. Këtu përfshihet edhe propozimi për 6 miliardë euro ndihmë.
Vendet e rajonit në raportet tregtare me Bashkimin Evropian përfitojnë edhe nga Marrëveshjet përkatëse të Stabilizim-Asociimit, KE-ja propozon që të shkohet edhe përtej kësaj, duke bërë edhe ndryshime në këto marrëveshje për të mundësuar kushte të barabarta në treg dhe mes vendeve në procesin e zgjerimit dhe vendeve anëtare të BE-së.
Të gjitha këto qëllime janë në përputhje edhe me idetë që po realizohen përmes Procesit të Berlinit, si dhe krijimin e “tregut të përbashkët rajonal”.
