Më 1 prill 2009, Shqipëria u bë anëtare me të drejta të plota në NATO, një moment i cili është shënuar me krenari dhe gëzim nga të gjithë shqiptarët. Ambasada e Shteteve të Bashkuara në Shqipëri veçon rolin e rëndësishëm të vendit në garantimin e sigurisë dhe stabilitetit në rajon.
“Zhvillimi i Shqipërisë në një partner dhe aleat të besueshëm ka qenë vërtet i jashtëzakonshëm. Sot Shqipëria ka siguri, stabilitet dhe qëndrueshmëri – . Së bashku, ne qëndrojmë më të fortë. Edhe shumë vite të tjera si aleatë në NATO! ” shkruan ambasada.
Presidenti Bajram Begaj shpreh rëndësinë historike të kësaj dite, duke e quajtur atë si një pikë kulmore në historinë e vendit. Ai falënderon SHBA-të dhe aleatët për mbështetjen në këtë rrugëtim drejt Euroatlantikut.
“Data e 1 prillit të vitit 2009 jetësoi vizionin Euroatlantik të shqiptarëve për të qenë pjesë e Aleancës politiko-ushtarake më të fuqishme të kohës sonë. Ky anëtarësim realizoi aspiratën e kahershme të popullit shqiptar, duke e kthyer atë te përkatësia e vet perëndimore, e mishëruar që në filozofinë e heroit tonë kombëtar, Gjergj Kastriotit, si strateg i aleancës së parë politiko-ushtarake me Perëndimin. Anëtarësimi i Shqipërisë në NATO është një ndër datat më të rëndësishme të historisë sonë kombëtare”, shkruan Begaj.
“Mirënjohës ndaj popullit shqiptar, SHBA-ve dhe aleatëve, të cilët mundësuan realizimin e këtij anëtarësimi. Shqipëria në këto 15 vite në NATO ka sjellë më shumë siguri për vendin, rajonin dhe hapësirën Euroatlantike.
Krenar për efektivët e Forcave tona të Armatosura, si dhe vajzat e djemtë shqiptarë në misionet paqeruajtëse dhe operacionet e NATO-s, si: Afganistan, Irak, Bosnjë, Kosovë, Bullgari, Letoni dhe Deti Egje. Shqipëria do të vijojë të jetë e palëkundur që, së bashku me aleatët, të mbrojë lirinë e të kontribuojë për një botë në paqe”, shkruan Begaj.
Ministri i Punëve të Jashtme, Igli Hasani, thekson se 15 vitet në NATO janë një rrugëtim solidariteti dhe mbrojtjeje kolektive, duke dëshmuar përkushtimin e Shqipërisë për sigurinë dhe paqen globale.
