Mijëra izraelitë shfaqën një protestë të shkallës së gjerë para parlamentit në Jeruzalem kundër kryeministrit Benjamin Netanjahu, duke kërkuar lirimin e pengjeve të mbajtura nga Hamasi në Gazë dhe organizimin e zgjedhjeve të parakohshme.

Pas gjashtë muajsh, duket se qeveria po e kupton që Bibi Netanjahu është bërë pengesë,” thotë protestuesi Einav Moses, vjehrri i të cilit, Gadi Moses, mbahet peng.
“Duket sikur ai nuk do vërtet që t’i kthejë ata, se kanë dështuar në këtë mision.”

Netanjahu, në një fjalim para kombit, premtoi të bëjë gjithçka për të kthyer pengjet në shtëpi dhe konfirmoi zotimin për një ofensivë ushtarake në Rafah.

“Do të bëj gjithçka për të sjellë pengjet në shtëpi,” tha ai. Ai shtoi se thirrja e zgjedhjeve të reja do të paralizonte Izraelin për gjashtë deri në tetë muaj dhe do të paralizonte bisedimet për pengjet.