Një shqiptar është arrestuar nga policia greke pas dyshimeve për 7 vjedhje në shtetin fqinj.

Policia fillimisht ka tentuar të ndalojë dy persona në aksin Perdhika – Parga, të cilët dyshoheshin për vjedhjen e një ore dore në një banesë në Perdhika, por vetëm njërin prej tyre kanë arritur ta vendosin në pranga. Personi i identifikuar është Adenis Binjaku, 30 vjeç, ndërkohë që personi tjetër, i identifikuar si Arben Qosja, 49 vjeç, ka arritur të arratiset duke shfrytëzuar errësirën dhe zonën e pyllëzuar.

Sipas njoftimeve të policisë, dy shqiptarët janë autorët e vjedhjeve në 7 banesa në Syvota dhe Perdhika të Thesprotisë në periudhën 27-31 mars. Ata kanë arritur të vjedhin 2255 euro, 3 orë me vlerë 900 euro, 3 celularë me vlerë 1900 euro, bizhuteri me vlerë 70 euro dhe rroba.

Adenis Binjaku, i arrestuari, rezulton se ndodhej në territorin grek pa dokumente rregullta dhe gjatë kontrolleve i janë gjetur 480 euro, 3 prozhektorë, një palë doreza, një orë dore, një celular, bizhuteri, ushqime dhe rroba.