Seanca e sotme parlamentare në Kuvendin e Shqipërisë është shoqëruar me tensione të larta. Deputeti i Partisë Demokratike (PD), Flamur Noka, iu afrua foltores së Kuvendit, duke provokuar ndërhyrjen e Gardës së Republikës.

Lindita Nikolla:

“S’më trysnon, je përfaqësuesi i një non-grate. 5 minuta pushim.”

Nikolla vendosi një pauzë të shkurtër prej 5 minutash për të qetësuar situatën.

Deputeti tjetër i PD-së, Oerd Bylykbashi, lëshoi akuza të forta ndaj kryeparlamentares Nikolla, duke e akuzuar për shkelje të Kushtetutës në lidhje me mospranimin e vendimit të grupit parlamentar të Rithemelimit për rikthimin e Sali Berishës.

Oerd Bylykbashi:
“Keni hapur këtë legjislaturë me shkelje. Ata që me akte politike duan të shkelin kushtetutën nuk është problemi juaj, por problem është kur e shkelni ju. Askush nuk i detyron deputetët përveç votës së popullit. Si në kushtetutë, dhe kod zgjedhor, nuk parashikohet sa një procedurë për shkarkim apo largim të një deputeti nga grupi parlamentar. Veprimi për të lënë jashtë grupit kreun e PD, është veprim i qëllimshëm, për të bllokuar opozitën në kryerjen e detyrës së saj. S’ka asnjë dispozitë që të përjashtojë deputetët. Nuk keni tagër që ju ta bëni këtë. Duhet të merrni dhe të lexoni këtë njoftim. Zoti Sali Berisha duhet të jetë pjesë e grupit, pasi veprimi juaj bëhet palë me antikushtetutën.”

Mospranimi i vendimit për rikthimin e Sali Berishës ka shkaktuar përplasje mes mazhorancës dhe opozitës. Berisha, një figurë kontestuese, mbetet një pikë e nxehtë në politikën shqiptare.

Akuzat e Bylykbashit për shkelje të Kushtetutës dhe procedurave parlamentare janë shumë serioze dhe tregojnë për një mosbesim të thellë midis palëve. Bylykbashi argumenton se veprimet e Nikollës janë të qëllimshme për të bllokuar opozitën.