Një seancë me tone të ashpra është mbajtur gjatë ditës së sotme, ndërsa protestuesit e opozitës kanë djegur goma jashtë parlamentit. Deputeti i PD-së së Rithemelimit, Tritan Shehu, iu drejtua kryetares së Kuvendit, Lindita Nikolla, duke i thënë se është bërë një komplot ndaj Sali Berishës. Shehu theksoi se ajo që ka ndodhur me Berishën është një goditje e rëndë ndaj parlamentarizmit të vendit.

Shehu deklaroi: “Në rregulloren e parlamentit nuk ekziston fjala parti. Nuk jemi në kohën e Partisë së Punës.” Kryetarja Nikolla iu përgjigj: “Një vendimmarrje partie nuk mund të zhbëhet nga një vendimmarrje grupi.” Shehu vazhdoi me akuzat e tij: “Ajo që po bëhet me Berishën është goditje e rëndë ndaj parlamentarizmit. Keni bërë komplot ndaj Berishës.” Pas këtyre deklaratave, Nikolla i hoqi fjalën.

Në ndërkohë, deputeti Flamur Noka përdori gjuhë të ashpër ndaj Nikollës, duke e quajtur atë “përfaqësuese dinjitoze e narkoregjimit” dhe “fytyra e turpit të këtij Parlamenti.” Noka theksoi se Berishën nuk mund ta ndalojë askush të jetë pjesë e grupit të PD-së. “Berishën askush nuk e ndalon të jetë deputetet i Shqipërisë sa kohë është në listat dhe grupi ka përcjellë një listë ku janë të gjithë deputetët. Nuk ke asnjë autoritet mbi këtë grup,” deklaroi ai.

Protesta jashtë parlamentit, e organizuar nga Rithemelimi, u intensifikua kur protestuesit i vunë flakën gomave dhe hodhën molotovë. Forcat e shumta të policisë rrethuan godinën e Kuvendit për të menaxhuar situatën e tensionuar.