Shtatë turistë të huaj janë shpëtuar nga punonjësit e policisë pasi kishin mbetur të bllokuar në kanionin e “Shpellës së Pëllumbave” në Përmet. Turistët, të cilët po eksploronin zonën me këmbë, u bllokuan për shkak të rritjes së nivelit të ujit në lumin e Langaricës, si pasojë e reshjeve të shiut.

Menjëherë pas marrjes së njoftimit, shërbimet e Komisariatit të Policisë Përmet dhe shërbimet zjarrfikëse u nisën drejt vendngjarjes. Punonjësit e Policisë arritën të nxjerrin turistët nga terreni i vështirë ku kishin mbetur të bllokuar.

Turistët ndodhen në gjendje të mirë shëndetësore dhe kanë falënderuar shërbimet e Policisë dhe ekipet zjarrfikëse për ndihmën e dhënë në kohë rekord.