Dy punonjës të tjerë të hotelit “Greccia” në Dhërmi janë arrestuar nga Policia si të përfshirë në vrasjen e recepsionistit Eraldo Nevruzi pak minuta pas mesnatës së të mërkurës. Daniel Qose, 33 vjeç, dhe David Larti, 30 vjeç, të dy nga Korça, dyshohen se kanë ndihmuar pronarin e hotelit, Gerald Shehu, në fshehjen e trupit të 31-vjeçarit, i cili kishte vetëm pesë ditë që kishte filluar punë në këtë hotel.

Dyshohet se Shehu ka qëlluar Nevruzin me një plumb në kokë në një prej dhomave të hotelit. Pas krimit, dy punonjësit e tjerë e kanë ndihmuar për të mbështjellë trupin me çarçaf dhe për ta fshehur. Deri më tani, trupi i Eraldos ende nuk është gjetur, dhe kërkimet janë zhvilluar në disa zona bregdetare ku dyshohet se mund të jetë fshehur.

Gerald Shehu u arrestua në Greqi në tentativë për t’u larguar me avion në Angli. Gjatë kontrollit në banesën e tij, policia gjeti një fishek arme zjarri dhe një kapsollë të goditur, të cilat Shehu i kishte fshehur në një kasafortë në dhomën e gjumit. Këto sende janë dërguar për ekzaminim në institutin e policisë shkencore, për të zbuluar nëse janë ato të përdorura në krim.

Ende nuk dihet arsyeja e saktë e krimit, por hetimet paraprake sugjerojnë se vrasja është kryer pas një debati dhe konflikti të çastit.