Kreu i PD-së, Sali Berisha, u ka bërë thirrje shqiptarëve mbrëmjen e sotme që të votojnë kandidatin e të djathtës për deputet në zgjedhjet evropiane. Gjatë fjalës së tij në një tubim të përditshëm qytetar, Berisha ka ftuar të gjithë shqiptarët në vendet e BE të mbështesin kandidatët shqiptarë në zgjedhjet për këshill, për deputet dhe për çdo pozitë tjetër.

Berisha: “Mirëmbrëma dhe përshëndetjet më të përzemërta, mirënjohje të pakufishme për qëndresën tuaj misionarë të vërtetë të kauzës të lirisë, dinjitetit, shpresës dhe të ardhmes së shqiptarëve. Të dashur miq, në emër tuaj dhe të PD dua t’u bëj thirrje shqiptarëve kudo që janë në vendet e BE, të votojnë kandidatin shqiptar për këshill, për deputet dhe për çfarëdo që të jetë. Sikundër ftoj demokratët dhe demokratet të votojnë partitë e qendrës së djathtë. Partitë aleate të PD-së, përndryshe të votojnë kandidatin që duan.”

Berisha theksoi rëndësinë e mbështetjes së kandidatëve shqiptarë në zgjedhjet evropiane, duke inkurajuar shqiptarët në diasporë të kontribuojnë në përfaqësimin politik të komunitetit të tyre.