Arqile Bollano është zgjedhur kryetar i Komanduar i Bashkisë së Himarës në mbledhjen e mbajtur pasditen e kësaj të premte. Bollano ishte në garë me Pervin Gjikurin, i cili u tërhoq pak minuta para mbledhjes.

Pas zgjedhjes, Bollano tha për mediat se nuk mund të parashikojë nëse do të dorëhiqet njësoj si paraardhësja e tij, por theksoi se do të bashkëpunojë me të gjithë.

“Falenderoj Këshillin Bashkiak për bashkimin që ka. Do mundohem të jem sa më shumë bashkëpunues. Edhe me ata që nuk më votuan. I jam mirënjohës atyre. Unë jam vazhdimësi e bashkisë dhe kemi rrugë për të bërë. Nuk ka nevojë për llafe, ka nevojë vetëm për punë.”

Zgjedhja e Bollanos erdhi pas dorëheqjes së kryetares së komanduar Blerina Balës, e cila qëndroi në këtë detyrë për 2 muaj. Ajo paraqiti dorëheqjen të mërkurën dhe njoftoi se largohet nga detyra për arsye personale. Bala mori detyrën e kryetares pas arrestimit të Jorgo Goros me akuzën e tjetërsimit të dy pronave. Ndërkohë, kryetari i zgjedhur më 14 maj 2023 për bashkinë e Himarës, Fredi Beleri, ndodhet në burg për blerje votash.