Presidenti amerikan Joe Biden vizitoi Parisin, duke theksuar lidhjet e fuqishme mes Shteteve të Bashkuara dhe Francës për çështjet e sigurisë globale. Ai u prit me nderime të larta dhe së bashku me Presidentin Emmanuel Macron kryen homazhe për ushtarët e rënë gjatë luftës dhe u takuan me veteranët e Luftës së Dytë Botërore në një ceremoni zyrtare në Harkun e Triumfit. Më pas, dy liderët dhe zonjat e para shkuan drejt Pallatit Elysee për një drekë pune.
Në konferencën e përbashkët për shtyp, Biden dhe Macron trajtuan çështje kyçe si Izraeli, çështjet tregtare dhe situatën në Ukrainë. Biden, i cili ndodhet në Francë që prej 5 qershorit, mori pjesë në përkujtimin e 80-vjetorit të zbarkimit të trupave aleate në Normandi, ngjarje që shënoi një kthesë të rëndësishme në Luftën e Dytë Botërore. Në këtë kontekst, Biden bëri thirrje për mbrojtjen e demokracisë në mbarë botën.
Gjatë qëndrimit të tij në Francë, Biden u takua edhe me presidentin ukrainas Volodymyr Zelensky. Ai njoftoi një paketë të re ndihme ushtarake për Ukrainën, me vlerë 225 milionë dollarë, që përfshin municione, raketa, mortaja, artileri dhe raketa për mbrojtje ajrore. Kjo vjen pas ndihmës ushtarake prej 61 miliardë dollarësh të miratuar më herët nga Kongresi amerikan.
Presidenti Macron gjithashtu informoi Zelenskyn për përpjekjet e Francës në krijimin e një koalicioni të gjerë instruktuesish ushtarakë për Ukrainën. Kjo ndihmë ushtarake është thelbësore, pasi Rusia ka shënuar disa fitore në fushëbetejë, veçanërisht në rajonin e Harkivit.
Ndërkohë, zëdhënësi i Këshillit amerikan për Siguri Kombëtare, John Kirby, deklaroi se ndihma e fundit nga SHBA-ja ka ndihmuar ukrainasit të përmbysin disa avancime ruse, sidomos rreth Harkivit.
Presidenti rus Vladimir Putin, në një deklaratë nga Shën Petersburgu, shprehu gatishmërinë për bisedime me disa kushte, duke përfshirë pranimin e “realitetit të sotëm” – referencë për aneksimin e Krimesë dhe katër rajoneve në juglindje të Ukrainës. Putin gjithashtu theksoi superioritetin bërthamor të Rusisë dhe kritizoi mungesën e një sistemi paralajmërimi në Evropë.
Lufta në Ukrainë, e nisur më 24 shkurt 2022, ka rezultuar në mijëra të vdekur dhe miliona të zhvendosur. Perëndimi ka reaguar ndaj agresionit rus me sanksione të ashpra ekonomike, ndërsa Putin vazhdon ta cilësojë konfliktin si një “operacion special ushtarak” për të çmilitarizuar Ukrainën.
