Gjykata e Shkallës së Parë të Jurisdiksionit të Përgjithshëm Berat ka vendosur masën e sigurisë “arrest shtëpie” për Emilio Zema, një 20-vjeçar që aksidentoi me motor një turiste nga Nepali, shtetasen S.Th., 33-vjeçe, tre ditë më parë.

Masa e sigurisë është vendosur në ambientet e Spitalit Rajonal Berat, ku Zema ndodhet i shtruar dhe nën kujdesin e mjekëve për shkak të plagëve të marra gjatë aksidentit. Sipas dinamikës së aksidentit, 20-vjeçari po qarkullonte me shpejtësi jashtë normave të lejuara, ndërsa turistja po përpiqej të kalonte rrugën pa qenë në vijat e bardha, duke i prerë rrugën motorit.

Prokurori Eni Culli i kërkoi gjykatës vlerësimin e ligjshëm të arrestimit të Zemës për veprën penale “Shkelje të rregullave të qarkullimit rrugor” dhe caktimin e masës së sigurisë “arrest shtëpie”. Pasi dëgjoi organin e akuzës dhe pretendimet e avokatit mbrojtës të Zemës, gjyqtarja Lumturi Zhupa vendosi masën e sigurisë “arrest shtëpie” për 20-vjeçarin.