Kryeministri dhe kreu i Partisë Socialiste, Edi Rama, njoftoi se në kongresin e Partisë Socialiste, i cili do të mbahet më 20 korrik, do të prezantohet platforma për përzgjedhjen e listës së deputetëve për zgjedhjet e ardhshme parlamentare. Në një mbledhje online të Asamblesë, Rama theksoi se platforma dixhitale “Deputeti që duam” do të jetë më e gjerë dhe do të përfshijë një proces më të artikuluar.

“Është mirë që t’i japim vetes kohën e nevojshme nga kongresi zgjedhor deri kur të bëhet përzgjedhja përfundimtare e listës së deputetëve të PS,” tha kryeministri. Ai shtoi se eksperienca e zgjedhjeve të kaluara, ku u krijua platforma dixhitale “Deputeti që duam” dhe u mblodh një numër i madh aplikimesh, do të shërbejë si bazë për përmirësime të mëtejshme. Shumë të rinj që u paraqitën në atë platformë u bënë pjesë e listës së PS-së, dhe për zgjedhjet e ardhshme, platforma do të jetë më gjithëpërfshirëse dhe procesi më i artikuluar.