Deputeti i Partisë Demokratike (PD), Ervin Salianji, ka bërë thirrje për bashkim dhe hapje të dyerve për të gjithë drejtuesit e mënjanuar të partisë. Kjo thirrje vjen pas vendimit të Apelit që i dha vulën dhe logon e partisë Sali Berishës.

Në një reagim në rrjetet sociale, Salianji theksoi se mendimet dhe qasjet e ndryshme nuk duhet të jenë më arsye për ndarje brenda partisë. Ai argumentoi se bashkimi dhe debati i ideve brenda PD-së janë të domosdoshme për të sjellë ndryshimin që është i pashmangshëm.

Salianji vuri në dukje se kontributi i çdo demokrati duhet të vlerësohet, pavarësisht diferencave. Sipas tij, është koha për të hapur dyert për drejtuesit e mënjanuar të PD në çdo nivel dhe për të fuqizuar partinë në mënyrë që të përballen dhe të rrëzojnë qeverinë sa më shpejt.

“Mendimet dhe qasjet e ndryshme nuk duhet të jenë më arsye për ndarje! Duhet bashkim dhe betejë idesh brenda Partisë Demokratike. Shumicat dhe pakicat nuk janë të përjetshme, ndërsa Shqipëria po. Duhet të bashkohemi, pavarësisht dallimeve, për të lehtësuar ndryshimin që duhet dhe do të jetë i pashmangshëm! Çdo kontribut i demokratëve nuk duhet të humbë pavarësisht diferencave, ne jemi garancia që sakrificat e tyre do vlerësohen! Është koha për të hapur dyert edhe për drejtuesit e mënjanuar të PD në çdo nivel, të fuqizojmë PDSh dhe të përballemi dhe të rrëzojmë qeverinë një ore e më shpejt”, shkruan Salianji.