Lulzim Basha ka deklaruar se ende nuk ka marrë një vendim për të ardhmen e grupit të tij pas vendimit të Gjykatës së Apelit, e cila i dha vulën dhe logon e Partisë Demokratike Sali Berishës. Në përfundim të mbledhjes së Kolegjit të Kryetarëve, Basha tha se do të zhvillohet një bashkëbisedim me demokratët për të marrë një vendim. Ai theksoi se beteja është për parime dhe vlera, jo për karrige. Sipas Bashës, vulat nuk e bëjnë një njeri demokrat, por vlerat dhe parimet.

Një gjë është e sigurt që demokrat nuk të bën vula, por vlerat dhe parimet. Parimet tona janë ato të një Shqipëria demokratike. Ne na lidhin shumë gjëra, por ajo që na lidh është se Shqipëria dhe shqiptarët meritojnë më shumë. Për këtë si demokrat dhe si shqiptar marrim përgjegjësitë tona. Me këtë vetëdije do ta vazhdojmë këtë bashkëbisedimin me shqiptarët dhe më pas do ta vendosim. Kjo betejë kurrë nuk ka qenë për karrige.