Një 37-vjeçar është arrestuar pasi kundërshtoi me forcë një punonjës të Policisë së Rendit dhe u largua nga vendngjarja pas vendosjes së një mase administrative për parkim të gabuar. Ngjarja ndodhi në qytetin e Koplikut, ku punonjësi i Policisë kishte konstatuar një automjet të parkuar në një vend të ndaluar, duke penguar qarkullimin e automjeteve të tjera.
Gjatë kryerjes së detyrës për vendosjen e gjobës sipas Kodit Rrugor, drejtuesi i automjetit, shtetasi V. S., banues në fshatin Dedaj, reagoi me dhunë dhe u largua nga vendi i ngjarjes. Më pas, Policia kreu kontrolle dhe arriti ta arrestojë atë në banesën e tij.
“Specialistët e Sektorit për Krimet e Rënda të DVP Shkodër, në bashkëpunim me shërbimet e Forcës së Posaçme “Shqiponja” dhe të Komisariatit të Malësi e Madhe, arrestuan shtetasin V. S., 37 vjeç, banues në fshatin Dedaj.
Në qytetin e Koplikut, punonjësi i Policisë së Rendit ka konstatuar një automjet të parkuar në një vend që nuk lejohej, i cili pengonte qarkullimin e automjeteve të tjera. Gjatë ushtrimit të detyrës për venien e masës administrative sipas Kodit Rrugor, drejtuesi i automjetit, shtetasi V. S. ka kundërshtuar me forcë punonjësin e Policisë dhe është larguar. Pas kontrolleve nga Policia, shtetasi V. S. është kapur në banesën e tij”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme, për veprat penale “Kundërshtimi i punonjësit të policisë së rendit publik” dhe “Mosbindja ndaj urdhrit të punonjësit të Policisë”.
