Kryetari i Kuvendit të Kosovës, Glauk Konjufca, ka shprehur kritika të ashpra ndaj qasjes së bashkësisë ndërkombëtare ndaj Kosovës dhe Serbisë, duke theksuar se kjo qasje është e njëanshme. Sipas Konjufcës, ndërkombëtarët po tregohen të pavendosur dhe të rezervuar kur bëhet fjalë për ndëshkimin e Serbisë, megjithëse kanë informacione se shteti serb qëndron prapa sulmit të armatosur në Banjskë, më 24 shtator të vitit të kaluar.

Gjatë një konference për media, Konjufca theksoi se formati aktual i dialogut mes Kosovës dhe Serbisë, i cili është në vazhdimësi që nga viti 2011, e ka humbur relevancën pas ngjarjeve të fundit, veçanërisht pas sulmit terrorist në Banjskë. Ai deklaroi se ky sulm, që shkaktoi vdekjen e rreshterit të Policisë së Kosovës, Afrim Bunjaku, dhe tre sulmuesve serbë, ka pasur mbështetje të drejtpërdrejtë nga shteti serb, një fakt që është i njohur edhe nga bashkësia ndërkombëtare.

Konjufca shtoi se, përkundër kësaj, bashkësia ndërkombëtare është treguar e rezervuar për të ndëshkuar Serbinë dhe për të bërë më të qartë se çfarë pritet nga të dyja vendet. Ai vuri në dukje se një drejtim krejtësisht i ri është i nevojshëm për dialogun në Bruksel, i cili ndërmjetësohet nga Bashkimi Evropian.

Duke komentuar kërkesat e dërguara Kosovës për heqjen e masave ndaj qarkullimit të mallrave serbe, Konjufca theksoi se nuk pret që ndonjë progres i rëndësishëm të ndodhë në rundin e ardhshëm të dialogut, i paralajmëruar të mbahet së shpejti. Ai gjithashtu shtoi se Kosova nuk është e gatshme të heqë këto masa të paktën deri pas zgjedhjeve të përgjithshme të planifikuara për shkurt të vitit të ardhshëm.

Dialogu, në formatin qysh ka qenë prej vitit 2011, e ka pasur arkivolin më 24 shtator të vitit të kaluar, me sulmin terrorist në Banjskë, sepse informatat të cilat i posedon edhe bashkësia ndërkombëtare edhe institucionet tona të sigurisë, tregojnë qartë se ky grup i madh kriminal e ka pasur mbështetjen e drejtpërdrejtë prej shtetit serb”, ka thënë Konjufca në një konferencë për media.

Konjufca komentoi gjithashtu mbi raportimet që dërguari i Gjermanisë për Ballkanin, Manuel Sarrazin, ka kërkuar që të hiqen masat e sigurisë të Kosovës ndaj mallrave serbe. Ai theksoi se Procesi i Berlinit, një nismë e Gjermanisë për ndihmën e zhvillimit të rajonit të Ballkanit, nuk duhet të reduktohet vetëm në marrëveshje ekonomike si CEFTA.
Ne jemi të vetëdijshëm dhe kjo është e qartë që bashkësia ndërkombëtare është e njëanshme në relacionet mes Kosovës dhe Serbisë, për këtë arsye besoj që duhet një drejtm krejt i ri”, ka thënë Konjufca

Sipas tij, është e rëndësishme që të bëhen dallime mes çështjeve ekonomike dhe atyre të sigurisë, dhe të sigurohet që Kosova të trajtohet si një shtet i barabartë me Serbinë në këto marrëveshje rajonale.

Në përfundim, Konjufca theksoi se Kosova kërkon të përfaqësohet si shtet në CEFTA dhe jo përmes Misionit të Kombeve të Bashkuara në Kosovë (UNMIK), duke vënë në dukje se një drejtim i ri në dialog është i nevojshëm për të siguruar barazinë e Kosovës në marrëdhëniet ndërkombëtare.