Autoriteti i aviacionit në Maqedoninë e Veriut ka nisur hetimet pas pretendimeve se dy aeroplanë pasagjerësh ishin pranë një përplasjeje në ajër mbi Shkup më 7 shtator. Sipas faqes së gjurmimit të fluturimeve “Flightradar24”, aeroplani i “Turkish Airlines” dhe aeroplani turko-gjerman “Sunexpress” gati sa nuk u përplasën në qiell mbi Aeroportin Ndërkombëtar të Shkupit, rreth orës 18:32.

Aeroplani i “Turkish Airlines” ishte në rrugë nga Madridi drejt Stambollit, ndërsa aeroplani “Sunexpress” po fluturonte nga Dalaman, Turqi, drejt aeroportit Gatwick në Londër. “Flightradar24” raportoi se 30 sekonda para se të kalonin pranë njëri-tjetrit, të dy aeroplanët po fluturonin në të njëjtën lartësi prej 11 mijë metrash. Hetimet janë në vazhdim për të përcaktuar shkaqet e incidentit dhe për të shmangur ngjarje të ngjashme në të ardhmen.