Një lokal ku viheshin baste sportive dhe organizoheshin lojëra fati është zbuluar nga policia në lagjen “Partizani” të qytetit të Burrelit. Policia ka arrestuar pronarin e lokalit dhe ka proceduar në gjendje të lirë një shtetas tjetër.

Në cilësinë e provës materiale janë sekuestruar një sasi e vogël canabisi, një mjet prerës (thikë), 10 bileta bingoje, 3 celularë, një kompjuter, një printer dhe një armë sportive pistoletë. Materialet procedurale janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme.

Specialistët për Hetimin e Krimeve të Komisariatit të Policisë Mat, në bashkëpunim me Seksionin për Hetimin e Narkotikëve dhe Trafiqeve të DVP Dibër, kanë kryer kontrolle të vazhdueshme në ambiente të ndryshme me qëllim goditjen e rasteve të organizimit të kundërligjshëm të lojërave të fatit. Gjatë një kontrolli në një lokal në lagjen “Partizani” në Burrel, është konstatuar se aty viheshin baste sportive.

Në përfundim të veprimeve procedurale për këtë rast, është arrestuar në flagrancë pronari i lokalit, shtetasi A.D., 29 vjeç, banues në Burrel, i cili kishte përshtatur lokalin e tij për ushtrimin e aktivitetit të paligjshëm të lojërave të fatit. Po ashtu, gjatë kontrollit në banesën e një shtetasi tjetër, J.R., 20 vjeç, janë gjetur dhe sekuestruar një armë sportive pistoletë dhe dy fishekë.