Një ndodhi e pazakontë ka tronditur Francën ditët e fundit, kur një supermarket i madh, Grand Frais, raportoi se punonjësit e tij kishin gjetur dhjetëra paketime me kokainë të fshehura në arkat me banane.

Stafi në degët e Grand Frais në rajonin Bourgogne-Franche-Comté në Francën lindore ishte i habitur kur gjeti 50 kg drogë të fshehura nën paletat me banane. Ata shprehën shqetësimin për shëndetin e konsumatorëve, duke u frikësuar se kokaina mund të kishte kontaktuar me frutat dhe, për pasojë, të përfundonte në duar të konsumatorëve.

Një hetim është nisur për të zbardhur misterin se si droga përfundoi në raftet e supermarketit përmes bananeve kolumbiane, si dhe për të identifikuar dërguesit dhe pritësit e saj.

Një zëdhënës i rrjetit të supermarketit “Grand Frais” tha: “Ne po punojmë ngushtë me policinë për të siguruar që hetimi të ecë pa probleme dhe që stafi dhe klientët tanë të jenë të sigurt.”