Socialistët kanë nisur përgatitjet për zgjedhjet parlamentare të pranverës së ardhshme, me një mbledhje të Asamblesë së PS-së për Tiranën, e mbajtur me dyer të mbyllura. Mbledhja zgjati rreth 1 orë e 40 minuta, ku kryeministri Edi Rama ndau detyra dhe udhëzime për anëtarët, me një fokus të veçantë në përfshirjen e të rinjve dhe përdorimin e rrjeteve sociale, veçanërisht TikTok-ut.

Sipas burimeve, Rama u ka kërkuar anëtarëve një angazhim më të madh në terren dhe koordinim më të ngushtë me strukturat lokale të partisë. Gjithashtu, u theksua rëndësia e afrimit të prurjeve të reja në PS, duke synuar një qasje më moderne në komunikim dhe përfshirje.

Në takim, është diskutuar edhe ndarja e detyrave për drejtuesit politikë të PS-së në qarkun e Tiranës. Elisa Spiropali, që nuk ishte e pranishme për shkak të angazhimeve të saj, do të fokusohet te bashkitë Vora, Kamza, Rrogozhina dhe Kavaja. Ogerta Manastirliu do të koordinojë me strukturat e PS-së në Tiranë, ndërsa Erion Veliaj do të jetë përgjegjësi kryesor për fushatën dhe përgatitjen e skuadrave të PS-së në kryeqytet.

Kryeministri Rama ka kërkuar një rezultat më të mirë sesa ai i zgjedhjeve të vitit 2021 në qarkun e Tiranës, duke i vënë anëtarët e Asamblesë në presion për të rritur performancën në zgjedhjet e ardhshme.