Kryeministri Edi Rama, gjatë një takimi me kryebashkiakët, ka theksuar nevojën për një organizim më të mirë dhe trajnimin e strukturave përgjegjëse për përballimin e emergjencave natyrore, me fokus përmbytjet dhe zjarret. Duke u ndalur te përmbytjet e fundit në Vlorë, Rama deklaroi se edhe infrastruktura më e mirë nuk mund të përballojë goditjen e parë nga reshjet intensive, por është e domosdoshme që strukturat të jenë të përgatitura për të reaguar menjëherë.

Ai theksoi se ndryshimet klimatike po përkeqësojnë natyrën e këtyre fenomeneve, me raste të përmbytjeve të jashtëzakonshme që janë raportuar në vende si Austria dhe Bosnja, ku kanë humbur jetë njerëz dhe dëmet kanë qenë të mëdha. Rama vuri në dukje se reshjet po bëhen gjithnjë e më të paparashikueshme dhe të fuqishme, duke përmendur si shembull përmbytjen në Dubai, ku në 18 orë ra një sasi shiu e barabartë me reshjet e katër muajve në Londër.

“Sado e përparuar të jetë infrastruktura, nuk mund të përballojë goditjen e parë,” tha Rama, duke shtuar se problemi kryesor qëndron në dobësinë e reagimit të strukturave vendore.

Është fakt që të gjithë vendet duhet të përballen në periudhën e verës me zjarre, në vjeshtë dimër me përmbytje. Natyra e këtyre fenomeneve ka ndryshuar dhe ndryshon çdo vit. E kemi parë se çfarë ndodhi në Austri dhe pamë se çfarë ndodhi në ditët kur këtu u përmbyt Vlora, në Bosnje ku humbën jetën shumë njerëz dhe ku dëmet dhe sipërfaqja e plagës së hapur atje janë marramendëse. Ka një shpjegim të thjeshtë përtej analizave popullore dhe tendencioze që i bëhen përmbytjeve, që ka ndryshuar formacioni i reshjeve. Para ca kohësh u bë spektakolare përmbytja në Dubai, ku në harkun e 18 orëve ra një sasi shiu e barabartë me 4 juaj rresht shi në Londër. Nuk ka infrastrukturë sado ekselente të përballojë goditjen e parë. Ajo që ne s’mund ta neglizhojmë është dobësia që shfaqet në reagimin tonë në nivelin vendor qoftë për zjarret qoftë për përmbytjet. Duke e marrë te përmbytjet, e domosdoshme të ketë një fokus të veçantë te organizmi i strukturës, trajnimi, aftësimi dhe stërvitja e të gjithë strukturës që duhet të jetë gati për të dalë në terren në momentin e parë të reagimit. Kur është faza e goditjes s’ka ca bën askush, por e gjithë struktura duhet të vihet në funksion”, tha Rama.

Rama përfundoi duke theksuar rëndësinë e një reagimi të shpejtë dhe të organizuar nga strukturat vendore, si për zjarret ashtu edhe për përmbytjet, në mënyrë që të minimizohen pasojat në jetën e qytetarëve dhe në infrastrukturë.