Gjykata ka liruar Mariela Berishën, duke caktuar ndaj saj masën e sigurisë “arrest në shtëpi”, ndërsa ka lënë të pandryshuar masën “detyrim për paraqitje” për motrën e saj, Antonela Berisha. Dy motrat Berisha u vetëdorëzuan në ambientet e Policisë dy ditë më parë pas një ngjarjeje të rëndë që ndodhi në fund të muajit Gusht në një restorant te “Kodra e Diellit”.

Ngjarja e dhunshme u shkaktua kur dy motrat u afruan te tavolina ku ndodhej 24-vjeçarja Klea Prenga, dhe njëra prej tyre i gjuajti me gotë qelqi në fytyrë. Shkaku i sulmit fizik dyshohet të ketë qenë një lidhje paralele e blogeres me partnerin e Mariela Berishës.

Gjatë seancës gjyqësore, Mariela Berisha shprehu pendesë për veprimin e saj, duke thënë: “Kërkoj falje për çfarë kam bërë. Nuk e kam dëshiruar, dhe nuk e kam kërkuar apo planifikuar një situatë të tillë dhe aq më pak një pasojë të tillë. Kam mbi një vit që po kaloj një moment dhe një situatë të vështirë psikologjike. Jam në një bashkëjetesë dhe kam një fëmijë 2 vjeç, i cili ka nevojë për mua dhe për praninë dhe kujdesin tim. Kërkoj mëshirë.”

Avokatja e Marielës kërkoi një masë sigurimi më të butë se ajo që kishte kërkuar prokurori, duke theksuar se klientja e saj është pa asnjë precedent penal. Ajo theksoi se nuk ka asnjë arsye dhe asnjë shkak për të përsëritur veprime të ngjashme dhe se Mariela shprehet thellësisht e penduar. Avokatja gjithashtu njoftoi se Mariela është e gatshme të normalizojë marrëdhëniet me viktimën dhe të kërkojë publikisht falje, duke shprehur gatishmërinë për ta ndihmuar financiarisht Klea Prengën për shpenzimet e nevojshme për rehabilitimin e saj.

Ajo nënvizoi rëndësinë e pranishme së nënës për një fëmijë në këtë moshë, duke thënë: “Aktualisht, ajo është i vetmi person që mundet të kujdeset për fëmijën e saj, dhe prania e nënës është e domosdoshme.”