Tre dronë të nisur nga territori i Libanit sulmuan qytetin e Cezaresë në veri të Tel Avivit mëngjesin e së shtunës, me njëri prej tyre që arriti të shpërthejë në një strukturë, ndërsa dy të tjerët u neutralizuan nga ushtria izraelite. Sipas njoftimit zyrtar të ushtrisë izraelite, objektivi i sulmit ishte rezidenca e kryeministrit izraelit Benjamin Netanyahu, i cili nuk ndodhej në shtëpi në atë moment. Për fat, nuk janë raportuar të lënduar nga ngjarja.

Avionë luftarakë dhe helikopterë u dislokuan pranë vendndodhjes së sulmit në Cezaresë, ndërsa autoritetet izraelite kanë forcuar masat e sigurisë. Zëdhënësi i kryeministrit konfirmoi se synimi i sulmit me dronë ishte eliminimi i Netanyahut, por nuk dha detaje të mëtejshme rreth asaj nëse rezidenca e tij u dëmtua apo jo.

Pas ngjarjes, kryeministri Netanyahu reagoi përmes një video-mesazhi, duke theksuar se asgjë nuk do ta dekurajojë Izraelin në përpjekjen e tij për të arritur fitoren. Sulmi vjen në një kohë tensionesh të larta në rajon, duke nxitur shqetësime për përshkallëzimin e mëtejshëm të dhunës.