Gjykata e Korçës ka vendosur masën e sigurisë “Arrest me burg” për një 68-vjeçar, i cili u arrestua në Maliq më 16 tetor, pas akuzave për ngacmim seksual ndaj një vajze 11-vjeçare. Gjatë seancës, i akuzuari nuk pranoi asnjë nga akuzat, duke deklaruar: “Unë nuk e kam bërë, nuk e kam ngacmuar.”

Avokati i tij e cilësoi arrestimin si të paligjshëm dhe kërkoi lirimin e menjëhershëm të klientit. Sipas dëshmisë së vajzës së mitur, ajo pretendon se 68-vjeçari e ka ngacmuar në dyqanin e tij në fshatin Strelcë, të bashkisë Maliq.

Nëna e vajzës e konfirmoi ngacmimin, duke thënë për mediat se vajza ishte fyer me fjalë të papërshtatshme. Nga ana tjetër, vëllai i autorit hodhi poshtë akuzat, duke i cilësuar ato si të pabaza dhe duke sugjeruar se ngjarja ishte e stisur, duke pretenduar se familja e vajzës kishte borxhe në dyqanin e 68-vjeçarit. Kjo situatë ka ngjallur një debat të gjerë në komunitet, ndërsa hetimet vazhdojnë për të sqaruar rrethanat e ngjarjes.