Gjykata e Posaçme për Korrupsionin dhe Krimin e Organizuar (GJKKO) ka konfirmuar masën e sigurisë “arrest me burg” për Ilir Metën, presidentin e Partisë së Lirisë dhe ish-president të Shqipërisë. Ky vendim lidhet me hetimet që po zhvillohen ndaj tij për korrupsion dhe pastrim parash. Pas dy netëve të kaluara në qelitë e sigurisë tek Mine Peza, Meta do të transferohet në burgun 313 në Tiranë. Gjatë së njëjtës seancë, për bashkëshorten e tij, Monika Kryemadhi, gjykata vendosi masën e sigurisë “detyrim paraqitje.”

Seanca gjyqësore, e zhvilluar me dyer të mbyllura, u karakterizua nga tensione dhe përplasje verbale midis Metës dhe prokurorëve të SPAK, Altin Dumani, Arben Kraja dhe Sotir Kllapi. Meta, i cili zgjodhi të mbrohej vetë pa ndihmën e avokatëve, përdori gjuhë të ashpër dhe kërcënuese ndaj prokurorëve, duke i ofenduar dhe akuzuar për bashkëpunim me qeverinë. Në fillim të seancës, Meta i drejtoi prokurorëve fjalë të rënda, ndërsa e quajti kreun e SPAK, Altin Dumanin, “Dumduman”, duke e kërcënuar hapur përmes një gjesti simbolik të kapjes së veshit dhe duke paralajmëruar se “do t’i mbante mend çfarë do t’i bënte.”

Nga ana e saj, Monika Kryemadhi, përballë mediave pas seancës, kritikoi ashpër gjyqësorin dhe prokurorët, duke i akuzuar se veprojnë nën urdhrat e kryeministrit Edi Rama. Ajo u shpreh se Meta nuk i kërcënoi prokurorët, por “i përkëdheli” dhe se procesi gjyqësor është një farsë politike për të larguar vëmendjen nga çështjet reale si “inceneratorët dhe krimi i organizuar.” Ajo gjithashtu kritikoi mënyrën e arrestimit të Metës, duke e cilësuar atë si një akt dhune, dhe pretendoi se gjatë arrestimit Meta u godit në kokë nga një polic, të cilin ajo e quajti “motherfucker.”

GJKKO, në vendimin e saj zyrtar, konfirmoi gjithashtu masën e sigurisë “detyrim paraqitje” për Monika Kryemadhin, Ema Çokun dhe Piro Xhixhon. Të tre personat do të duhet të paraqiten çdo muaj në zyrat e Policisë Gjyqësore, sipas një kalendari të përcaktuar. Kryemadhi dhe të tjerët përballen me akuza për korrupsion dhe pastrim të produkteve të veprës penale.

Kryemadhi, në deklaratat e saj para mediave, denoncoi atë që ajo e quajti “drejtësia e kastruar” e qeverisë së Edi Ramës dhe akuzoi SPAK-un për mosveprim lidhur me çështjet e mëdha të korrupsionit, duke përmendur konkretisht aferën e inceneratorëve dhe ndërtimet pa leje.

Në vendimin e saj, GJKKO vendosi që Ilir Meta të mbetet në burg si i akuzuar për “korrupsion pasiv të funksionarëve të lartë shtetërorë ose të zgjedhurve vendorë” në tre raste, nga të cilat dy raste në bashkëpunim, si dhe për “pastrim të produkteve të veprës penale ose veprimtarisë kriminale,” të kryer në bashkëpunim dhe më shumë se një herë. Ndërkohë, Monika Kryemadhi, Piro Xhixho dhe Ema Çoku do të duhet të paraqiten në policinë gjyqësore çdo muaj, sipas vendimit të GJKKO.

Kundër këtij vendimi, të akuzuarit kanë të drejtë të bëjnë ankim brenda pesë ditëve në Gjykatën e Posaçme të Apelit për Korrupsionin dhe Krimin e Organizuar.