Presidenti i Partisë së Lirisë, Ilir Meta, ka kërkuar lirimin nga burgu përmes një kërkese ankimore të depozituar në Apelin e Gjykatës së Posaçme kundër Korrupsionit dhe Krimit të Organizuar (GJKKO). Avokati i tij, Genc Gjokutaj, e cilësoi vendimin për masën “arrest me burg” si të pabazuar dhe theksoi se nuk përmbush asnjë kriter të përgjithshëm apo specifik për vendosjen e një mase të tillë sigurie.

Gjokutaj u shpreh kundër kërkesës së SPAK dhe vendimit të gjykatës, duke argumentuar se nuk ekziston dyshimi i arsyeshëm i bazuar në prova për të justifikuar arrestimin. “Ky është një vendim i tipit thashethem,” deklaroi avokati, duke nënvizuar mungesën e provave për të mbështetur masën e sigurisë ndaj Metës.