Policia kriminale ka kryer kontrolle në dy klinika private në Shkodër, në përpjekje për të gjetur një person të plagosur që besohet se ka qenë në makinën tip “Benz” e cila u sulmua me armë më 30 tetor 2024 në zonën e Dobraçit. Kontrollet u realizuan pas dyshimeve se një person i plagosur mund të ketë kërkuar shërbim mjekësor në këto klinika, por më pas është larguar pa u lokalizuar nga autoritetet.

Hetimet fokusohen në Ibrahim Licin, një person i shpallur në kërkim lidhur me vrasjen e Endri Mustafës, ndonëse nuk ka informacione zyrtare nëse ai ka qenë në makinën e sulmuar. Policia kërkon të sekuestrojë pamjet filmike dhe materialin mjekësor për të verifikuar nëse një person i plagosur është paraqitur për mjekim.

Për identifikimin shkencor të viktimave dhe personit të mundshëm të plagosur, janë dërguar për analizë në laborator mostra gjaku, gjurmë gishti dhe profile biologjike nga vendngjarja. Hetuesit kanë mësuar se dy persona, Hamza Lici dhe Arlind Bushati, kanë hyrë në territorin shqiptar nga Mali i Zi ditën e ngjarjes, dhe kanë lënë gjurmë në pikën kufitare.

Sipas hetimeve, makina e përdorur nga vrasësit doli nga një rrugicë pranë shtëpisë së Astmer Bilalit, i cili aktualisht është në burg për lidhje me dosjen “Metamorfoza”. Vrasësit, pas ndjekjes, hapën zjarr me armë automatike ndaj makinës që transportonte viktimat, duke shkaktuar vdekjen e menjëhershme të dy prej tyre dhe të një çifti të pafajshëm që po kalonte në rrugë.

Policia ka ngritur dyshime se disa individë të tjerë mund të kenë marrë pjesë në këtë vrasje, duke përfshirë S.Xh, D.M, E.H dhe tre persona të tjerë si transportues dhe vëzhgues. Një kërkesë për bashkëpunim është bërë gjithashtu me policinë e Malit të Zi për të mësuar rreth lëvizjeve të Hamza Licit dhe Arlind Bushatit. Ngjarja mbetet ende e pazbuluar, ndërsa SPAK ka në dorë bisedat që ndihmojnë në zbardhjen e rastit të vrasjes së Bardhok Pllanajt, që ndodhi më parë.