Mustafa Lici, një nga emrat më të njohur të Shkodrës dhe i njohur si “Plaku” i fisit Lici, u mor në pyetje nga policia pas ngjarjes tragjike të 30 tetorit në Dobraç, ku mbetën të vrarë Hamza Lici, Arlind Bushati dhe çifti Flutura dhe Bashkim Basha. Pas ceremonisë mortore të të birit, policia shkoi në banesën e Licit për ta intervistuar rreth kësaj ngjarjeje të rëndë.

Në dëshminë e tij, Mustafa Lici tregoi për lidhjen e ngushtë mes djalit të tij, Hamza, dhe Arlind Bushatit, një miqësi që kishte vijuar prej marrëdhënies së ngushtë mes tij dhe babait të Arlindit, Xhemal Bushatit. Mustafa tregoi se ditën e ngjarjes, Hamza dhe Arlindi ishin nisur drejt Malit të Zi për në Podgoricë, por, sapo kishin hyrë në Dobraç, ishin qëlluar nga një pritë e organizuar.

Sipas rrëfimit të tij, Hamza Lici, të cilin Mustafa e përshkroi si besimtar të devotshëm që falte 5 vakte në ditë, nuk kishte asnjë precedent penal dhe u vra pa faj, me të vetmin “faj” që ishte vëllai i Ibrahim Licit. Mustafa tha gjithashtu se Ibrahim Lici ndodhej aktualisht në Turqi.

Kur policia e pyeti nëse kishte ndonjë dyshim konkret për autorët e sulmit, Mustafa pranoi se kishte dyshime, por nuk mund të tregonte emra konkretë në këtë fazë.

Policia e Shkodrës, pesë ditë pas ngjarjes, ka ngritur dyshime të forta se atentati mund të jetë organizuar nga një grup kriminal që përfshin familjet “Bajri” dhe “Bilali”. Vrasja mendohet se është motivuar nga gjakmarrja dhe përplasjet e vazhdueshme mes këtyre familjeve dhe familjes Lici në Shkodër.