Një ish-polic shqiptar, Artimond Jaupaj, është nën hetim për bashkëpunimin e tij me agjencinë investigative italiane “Equalize” në Itali, e cila ka arritur të aksesojë informacion të ndjeshëm nga databazat e policisë, të drejtorisë së tatimeve dhe të politikanëve. Kjo agjenci, e lidhur me Enrico Pazzali dhe e drejtuar nga ish-superpolici Carmine Gallo, dyshohet se ka kryer aktivitete të paligjshme, përfshirë përgjuar në restorant bankierin Alessandro Gatto nga JP Morgan dhe depërtuar në emailin e Presidentit të Italisë, Sergio Mattarella.

Sipas përgjimeve të publikuara nga Corriere della Sera, në një bisedë ndërmjet Gallos dhe Jaupajt, ky i fundit tregon aftësinë për të kontrolluar lidhjet me krimin e organizuar të individëve në Shqipëri duke përdorur akses të paligjshëm në databazat shqiptare. Jaupaj premton se do t’i verifikojë emrat e kërkuar nga Gallo përmes kontakteve të tij në Shqipëri, duke përmendur se të dhënat e policisë shqiptare janë të aksesueshme.

Autoritetet italiane kanë shpallur emrat e personave të dyshuar në këtë skandal kibernetik, duke përfshirë Pazzali, Gallo, dhe Nunzio Calamucci, i cili është lidhur me grupin e hakerave “Anonymous” dhe që besohet të ketë patur qasje në të dhëna konfidenciale mbi 800 mijë raste në Itali. Kjo ngjarje ka ngritur shqetësime të thella për sigurinë e të dhënave në të dy vendet dhe ka vënë në pah dobësitë në sistemet e tyre të sigurisë.