Miliona amerikanë po votojnë për të zgjedhur presidentin e 47-të të Shteteve të Bashkuara, ndërsa qendrat e votimit mbyllen në kohë të ndryshme në të gjithë vendin. Në ora 18:00 (mesnatë me orën e Shqipërisë) do të mbyllen qendrat e para, ndërsa qendrat e fundit do të mbyllen në ora 01:00 (07:00 e mëngjesit, 6 nëntor me orën tonë).

Zëvendëspresidentja Kamala Harris ndodhet në selinë e Komitetit Kombëtar Demokratik në Uashington DC, ndërsa ish-presidenti Donald Trump ka planifikuar të presë rezultatet në selinë e tij në Florida. Sidoqoftë, disa gazetarë janë përjashtuar nga ndjekja e këtij aktiviteti.

Gara për presidencë është shumë e ngushtë, me disa shtete të rëndësishme që pritet të kenë rol vendimtar në rrugën drejt fitores. Këto shtete përfshijnë Arizona, Xhorxhia, Miçigani, Nevada, Karolina e Veriut, Pensilvania dhe Ëisconsin. Pensilvania, me 19 vota elektorale, është ndër më të rëndësishmet, pasi kandidatët kanë nevojë për të paktën 270 nga 538 vota elektorale për të fituar.

Mbi 244 milionë qytetarë kanë të drejtë vote, dhe më shumë se 81 milionë votuan para ditës së zgjedhjeve. Ndërkohë, në Capitol Hill është arrestuar një person që dyshohet se kërcënoi me një masakër në rast të një fitoreje të ish-presidentit Trump.

Nëse fiton Kamala Harris, ajo do të hyjë në histori si gruaja e parë dhe e para me origjinë aziatike që arrin postin e presidentit të SHBA. Nga ana tjetër, një fitore e Trump do ta bënte atë presidentin e parë të shpallur fajtor për një krim që rikthehet në Shtëpinë e Bardhë.

Sondazhet e para të CNN zbulojnë se 48% e votuesve preferojnë Harris, krahasuar me 52% që preferuan Biden në 2020. Ndërsa 44% preferojnë Trump.